Wednesday, November 22nd, 2006

Tachwedd 22

Bu llu o gefnogwyr ysbytai cymunedol yn y Cynulliad. Galwyd am ymateb gan y llywodraeth ond yn ofer. Er bod y Prif Weinidog yn hapus i fod ar gael i dynnu ei lun ar gyfer cyhoeddusrwydd ar un ochr i’r gwydr nid oedd yn barod i fentro y tu draw i wynebu pobl a ddaeth i’w lobio yn y Cynulliad. Un o gryfderau y Cynulliad yw y ffaith bod aelodau ar gael i’r cyhoedd ond bydd y bobl a ddaeth i’r Cynullid heddiw yn dra siomedig nad oedd y llywodraeth yn barod i’w cyfarfod. Arwydd arall bod y llywodraeth Llafur yn encilio ac yn ymwrthod a’r cyfrifoldeb i wynebu y cyhoedd. Llais y bobl yn cael ei anwybydu.

Ar lefel lleol. Cefais y cyfle i godi sefyllfa Cartref Anedd yn Llanybydder. Erbyn hyn mae Cyngor Sir Caerfyrddin wedi ildio a chytuno i gadw’r cartref ar agor hyd nes bod yr uned newydd ar agor. Yn bwysicach mae’r Cyngor yn mynd i sicrhau bod ystafelloedd ar gael ar gyfer gofal gorffwys. Llais y bobl yn gorchfygu.

 Cyhoeddwyd heddiw bod Tywysog Charles wedi arwyddo cytundeb i brynnu cartref yng Nghymru ac yn bwysicach yn Nwyrain Caerfyrddin a Dinefwr. Cefais gyfle i’w groesawu i’r etholaeth. Ni fum erioed yn weriniaethwr brwd er nad oedd gennyf fawr o olwg ar y frenhiniaeth. Ond o graffu ar y gwaith a gyflawnir gan y Tywysog rhaid cydnabod ei fod yn defnyddio ei swydd i gyflawni llawer iawn o wasanaeth cymunedol pwysig iawn ac i wneud datganiadau adeiladol. Mae’n lais ar ran y bobl.

 Cefais gyfle i godi cwestiwn i’r Gweinidog Diwylliant am gynhyrchiadau Hijynx. Mae’r cwmni drama proffesiynol yma yn cynnig cyfle i bobl ag anghenion arbennig i gymryd rhan mewn cynhyrchiadau ar lwyfanau led led Cymru. Dyma enghraifft perffaith o roi llais i bobl.

Trafodaethau am golli swyddi yn Abertawe a aelodau o bob plaid yn mynegi pryder. Os yw pobl yn feirniadol o’r Cynulliad mae o leiaf yn rhoi cyfle i aelodau i godi llais dros bobl

 

News Releases