Wednesday, March 14th, 2007

Danso

Dyma gwestiynau ac atebion o’r Senedd ynglŷn â’r sefyllfa gyda Dansco
—————————————————————————————————-
C3 Rhodri Glyn Thomas: Pa drafodaethau mae’r Llywodraeth wedi eu cynnal parthed dyfodol y diwydiant llaeth? OAQ2399(FM)

Y Prif Weinidog: Yr ydym yn gweithio gyda’r Cyngor Datblygu Llaeth a grwp strategaeth y diwydiant llaeth, o dan ymbarél y bartneriaeth bwyd-amaeth, er mwyn gweithredu’r cynllun gweithredu strategol drafft ar gyfer y diwydiant llaeth yng Nghymru. Daw cyfnod ymgynghori y cynllun drafft hwnnw i ben ddiwedd y mis.

Rhodri Glyn Thomas: Tybiaf y byddai strategaeth ar ddyfodol y diwydiant llaeth yn nodi pwysigrwydd cadw canolfannau prosesu yng nghanol y maes llaeth. Gobeithiaf y byddwch yn cytuno bod maes llaeth y de orllewin yn eithriadol o bwysig, nid yn unig yng nghyd-destun Cymru, ond yng nghyd-destun y Deyrnas Unedig hefyd.

Gwyddoch fod pryder mawr ynglyn â dyfodol ffatri Dansco. Mae dros 100 o ffermwyr wedi bod yn cyflenwi llaeth i’r ffatri ac mae 130 o bobl yn gweithio yno; mae’n ganolfan hynod lewyrchus ond ar hyn o bryd mae’n wynebu problemau enfawr.

Beth y mae eich Llywodraeth yn ei wneud i ymyrryd yn y sefyllfa honno i sicrhau dyfodol ffatri Dansco ac i sicrhau nad ydym yn colli canolfan brosesu arall o’r maes llaeth yn y de-orllewin?

Y Prif Weinidog: Cytunaf fod y tair sir yn Nyfed—Ceredigion, sir Benfro a sir Gâr—yn hollbwysig, oherwydd eu tirwedd a’u tywydd, i’r diwydiant llaeth. Yn dilyn problemau’r ffatri gaws a’r ffatri bacio yn Nyffryn Aeron hefyd, mae problemau wedi codi ynghylch taliadau i ffermwyr o ran ffatri Dansco, sy’n cynhyrchu caws mozzarella i gwmnïau sy’n gwneud pizzas. Fodd bynnag, yr hyn sy’n bwysig yw bod Carwyn Jones wedi cyfarfod â chynrychiolwyr ar ddwy ochr y ffrae i drafod taliadau ac yn y blaen, ac i sicrhau, os oes modd, ein bod yn gallu eu hannog i gyrraedd cytundeb fel bod y cyflenwad llaeth, y ffatri a thaliadau i ffermwyr oll yn parhau.

News Releases